Ардчилсан нам Монголын улстөрийн нэг тулгуур багана гэдгийг үгүйсгэх нь утгагүй. Тиймээс ч Ардчилсан намын шинэчлэлийн тухай сэдэв сонгуулиас хойш хэвлэлийн хуудаснаа үргэлж бичигдэж байгаа. Тэрчлэн АН-ыг угтах жилүүдэд хэн удирдах вэ? АН-ын шинэ удирдлага намдаа шинэчлэлийн салхи ширүүхэн салхилахад түүчээлэн хувь нэмрээ оруулж дийлэх үү? гэхчлэн хариулт нэхсэн, хүлээлт үүсгэсэн асуултууд тавигдаж байгаа. Мэдээж тэгээд АН-ын даргын сунгаанд нэр дэвшсэн нэр бүхий таван эрхмийн хэнд нь намын гишүүд илүүтэй итгэл хүлээлгэх вэ гэдгээс намын цаашдын өнгө төрх шууд хамаарна.
Намын одоогийн дарга З.Энхболдоос таван багц сум авч, гар гартаа атгасан нэр дэвшигчид сурталчилгаагаа их эзэн Чингис хааны өлгий нутаг Хэнтий аймгаас эхлүүлж 40 хоногийн хугацаанд Монгол Улс даяар үргэлжлүүлэхээр замдаа яваа. Гэхдээ юмны наадах цаадахыг мэдэх хүмүүсийн хэлж ярьж байгаагаар бол намын даргын сунгаа үнэн хэрэгтээ фракц хоорондын өрсөлдөөн болж байна гэдгийг хэлж буй юм. Н.Алтанхуяг, С.Эрдэнэ, Д.Эрдэнэбат, Л.Гантөмөр нарын тухайд бол угаасаа аль аль фракцийнх болохыг бүгд мэднэ. Тэгвэл тэд АН-ыг шинэчлэх их үүрэг хүлээх намын даргын сунгаанд оролцохдоо, фракцийнхаа эрх ашгаас дээш гарч харж, сэтгэж нэг л чадахгүй байгаа бололтой юм. Харин Ж.Батзандангийн тухайд аль нэг фракцийн хүн биш. Ардчилсан намын дотоод зөрчил олон фракциудаас болж байгаа гэдгийг тэр хэлдэг. Намын эрх ашгаа, түмний эрх ашгийг фракцийн эрх ашгийн дээр гаргаж тавих ёстой гэдгийг тэр хэлдэг. Тиймдээ ч энэ удаагийн намын даргын сунгаанд өрсөлдөж байгаа бусад дөрвөн нэр дэвшигчээсээ тэр ялгарч байгаа гэхэд болно.
Ж.Батзандан эрхэм хэлэхдээ “АН дотор үзэл бодлын зөрүү маш их байдаг. Манайх таван намын нэгдэл учраас таван тийш харах тохиолдол цөөнгүй. Гэхдээ үндэсний эрх ашигтай холбоотой томоохон асуудалд AH, МАН нэгдээд явах нь зүйтэй. Энэ улсын төлөө яв гэж л биднийг сонгосон болохоос авлигач, хулгайн бүлэглэлд нэгдэн ор гэж сонгоогүй. Эрхэм түшээд минь, хууль хяналтын байгууллагын эрхэм нөхөд минь. Сүүлдээ дарга нар нь нийлж хулгай хийдэг боллоо шүү дээ. Үүнийгээ болих хэрэгтэй. Монголоо аваръя гэвэл бид зарчмын хувьд нэг талд гарах хэрэгтэй. Үзэл санаа, үнэт зүйлийнхээ талд гарч, өвөг дээдсийнхээ сургаалийг санах хэрэгтэй.” гэж байгаа юм.
Уг нь АН гэж улстөрийн хүчин улс Монголынхоо төлөө зүтгэе гэж байгаа бол одоо л хамтдаа нэг цул шиг байж, нэг чигт харах ёстой болоод байгаа билээ.
Сэтгэгдэл бичих