Истанбулын халдлагын хохирогчдын нэрсийг тогтоожээ

Истанбул хотын шөнийн цэнгээний газарт халдлага болох үеэр амиа алдсан 39 хүний 38-ыг нь хэн болохыг нь таньж тогтоогоод байна гэж Туркийн Хуульзүйн яамны эх сурвалжууд мэдэгдлээ.

Шинэ оны эхний өдрийн үүрээр Истанбулын Ортакёй дүүрэг дэх “Reina” шөнийн цэнгээний газар руу нэгэн этгээд дайран орж, гал нээсний улмаас 39 хүн, тэдний дотор нэг цагдаа амь үрэгдэж, 69 хүн шархадсан юм. Амь үрэгдэж, шархадсан хүмүүсийн дунд гадаадын олон иргэн байна.

Амиа алдсан хүмүүсийн 11 нь Туркийн иргэн, нэг нь Турк-Бельгийн иргэн гэж нэрээ нууцлахыг хүссэн яамны эх сурвалжууд мэдэгдэв. Хэвлэл мэдээллийн хэрэгслүүдээр энэ халдлагатай холбоотой мэдээллийг цацахыг хязгаарласантай холбоотойгоор эх сурвалжууд нэрээ нууцалж байна.

Хохирогчдын долоо нь шинэ оныг угтахаар Саудын Аравигаас Истанбулд ирсэн хүмүүс байв. Хохирогчдын дунд Ливан, Иракийн тус бүр гурван иргэн, Тунис, Энэтхэг, Марокко болон Иорданы тус бүр хоёр иргэн байна. Мөн Кувейт, Канад, Израиль, Сири болон Оросын тус бүр нэг иргэн халдлагын үеэр амиа алджээ.

Нэг хохирогчийг аль улсын иргэн болохыг нь таньж тогтоогоогүй байгаа ажээ.

Туркийн албаны хүмүүс хохирогчдын нэрсийг гаргаагүй байна.

Халдлага үйлдсэн этгээдийг ашигласан бууных нь загвараар хэн болохыг нь олж тогтоохоор аюулаас хамгаалах хүчнийхэн ажиллаж байгаа аж. Мөн “Лалын улс” цэрэгжсэн бүлэглэл болон Курдын босогчидтой сэжигтэн этгээд холбоо сүлбээтэй эсэхийг мөрдөгчид шалгаж байна.

Туркийн хэвлэлүүдэд мэдээлснээр, сэжигтэн этгээд автомат буугаа шөнийн цэнгээний газарт орхин явжээ. Мөн гэмт этгээд таксигаар тус газарт очсон байж магадгүй аж.

Г.Доржханд

Эх сурвалж: Монцамэ