Канад Улсаас Монгол Улсад суугаа Элчин сайд Стивен Дауст болон Холбооны шүүхийн ХЭГ-ын хөтөлбөрийн захирал Олег Шаков нарыг хүлээн авч уулзлаа

Монгол Улсын Их Хурлын Хууль зүйн байнгын хорооны дарга Д.Цогтбаатар өнөөдөр (2026.04.16) Канад Улсаас Монгол Улсад суугаа Онц бөгөөд Бүрэн эрхт Элчин сайд Стивен Дауст, Канад Улсын Холбооны шүүхийн хэрэг эрхлэх газрын Олон улсын хөтөлбөрийн захирал Олег Шаков нарыг хүлээн авч уулзлаа.

Уулзалтаар Канад Улсын Холбооны шүүхийн хэрэг эрхлэх газраас Монгол Улс дахь шүүх эрх мэдлийг хэрэгжүүлэгч байгууллагуудтай хамтран 2025 оноос хэрэгжүүлж буй “Тэгш эрх, шударга ёсыг хүн бүрд” төслийг танилцуулж, хамтын ажиллагааны боломж, нөхцөлийн талаар санал солилцов. Хоёр улсын шүүхийн байгууллагуудын хамтын ажиллагаанд тулгуурлан, таван жилийн хугацаатай хэрэгжих энэхүү төсөл нь иргэн төвтэй, жендэрийн мэдрэмж бүхий хараат бус, хариуцлагатай шүүхийн тогтолцоог бэхжүүлэх, шүүхийн хараат бус, шударга байдалд иргэдийн итгэлийг нэмэгдүүлэх, шударга шүүхээр шүүлгэх эрх, эрх чөлөөг бататгахад чиглэж байна хэмээн танилцуулгад дурдсан. Мөн иргэдийн эрх зүйн мэдлэг, боловсролыг дээшлүүлэх, шүүхэд мэдүүлэх эрхийн баталгааг сайжруулах, шүүхийн үйлчилгээг иргэдэд ойртуулах, хууль тогтоомжийг боловсронгуй болгох чиглэлд төрийн эрх мэдлийн институцууд буюу хууль тогтоох болон гүйцэтгэх, шүүх эрх мэдлийн байгууллагуудын зөвлөлдөх механизмыг бүрдүүлэхийг зорьж төлөвлөсөн тул дэмжлэг хүсэж байна гэв.

Хууль зүйн байнгын хорооны дарга Д.Цогтбаатар, шүүхийн хараат бус, бие даасан зарчмыг хангуулах, эрх зүйн орчныг бий болгоход парламент санаа тавьж, тодорхой ахиц, шинэчлэлүүдийг санаачлан, хийж хэрэгжүүлж ирсэн. Үүний үр дүнд манай улсын шүүх үйл явцыг олон нийт нээлттэй, шууд дамжуулалтаас үзэх боломж бүрдсэн. Цаашид олны анхаарал татсан хэрэг явдал, эргэлзээ төрүүлсэн асуудлыг хэрхэн шийдвэрлэсэн талаараа ил тод мэдээлдэг олон улсын сайн жишгийг нэвтрүүлэх нь иргэдийн итгэл үнэмшилд эерэг нөлөөтэйг онцолж, дэмжиж ажиллахаа илэрхийллээ. 

Уулзалтад Монгол Улсын Их Хурлын Хууль зүйн байнгын хорооны болон Тамгын газрын төлөөлөл, Канад Улсын Нью Брансвик мужийн Давж заалдах шатны шүүхийн Ерөнхий шүүгч Марк Ричард, Канад Улсын Элчин сайдын яамны Хөгжлийн хөтөлбөрийн ажилтан Б.Оюунбилэг, Канад Улсын Холбооны шүүхийн хэрэг эрхлэх газрын Төслийн ажилтан Кэйт Жэнсон, “Тэгш эрх, шударга ёсыг хүн бүрд” төслийн Монгол дахь багийн удирдагч С.Билгүүн, Төслийн зөвлөх Д.Зүмбэрэллхам нар байлцлаа