УМАЙН ХҮЗҮҮНИЙ ӨМӨН, УРЬДАЛ ЭМГЭГИЙГ ОНОШИЛЖ ЭМЧЛЭХ ЭМЧИЛГЭЭНИЙ АРГА АРГАЧЛАЛЫГ ЭЗЭМШҮҮЛЭХ, СУРГАГЧ БАГШ БЭЛТГЭХ СУРГАЛТЫГ ЗОХИОН БАЙГУУЛЖ БАЙНА

УМАЙН ХҮЗҮҮНИЙ ӨМӨН, УРЬДАЛ ЭМГЭГИЙГ ОНОШИЛЖ ЭМЧЛЭХ ЭМЧИЛГЭЭНИЙ АРГА АРГАЧЛАЛЫГ ЭЗЭМШҮҮЛЭХ, СУРГАГЧ БАГШ БЭЛТГЭХ СУРГАЛТЫГ ЗОХИОН БАЙГУУЛЖ БАЙНА

Умайн хүзүүний өмөн, урьдал эмгэгийг кольпоскопи болон цахилгаан гогцоогоор өөлөх мэс ажилбар (LEEP)-ын арга аргачлалыг эзэмшүүлэх, сургагч багш нарыг бэлтгэх сургалт өнөөдөр ХСҮТ-д эхэллээ.

Сургалтыг удирдан явуулахаар АНУ-ын Техасын Их сургуулийн МД Андерсоны Хавдрын Төв, Бүгд Найрамдах Солонгос Улсын Католик Их сургуулийн багш, эмч мэргэжилтнүүд манай улсад ирээд байгаа юм.

Умайн хүзүүний өмөнгийн дөрөвний нэг нь Ази номхон далайн баруун бүс нутагт бүртгэгддэг бөгөөд өвчлөлийн 90 хувь нь бага болон дунд орлоготой улс орнуудад тохиолдож байна.

Монгол Улсад 2024 онд умайн хүзүүний хорт хавдрын 521 шинэ тохиолдол, 167 нас баралт бүртгэгдсэн. Умайн хүзүүний хорт хавдар нь урьдчилан сэргийлж, эрт илрүүлж болох хавдар хэдий ч манай улсын эмэгтэйчүүдийн дунд зонхилон тохиолдох хавдрын 3-рт орж байна.

Ази номхон далайн баруун бүсэд умайн хүзүүний өмөнг устгах стратегийн үйл ажиллагааны зорилтын хүрээнд уг сургалтыг зохион байгуулж байгаа юм. Тодруулбал, Дэлхийн улс орнууд 90-70-90 зорилтыг хэрэгжүүлж 2030 он гэхэд умайн хүзүүний өмөнг устгах боломжтой хэмээн үзэж байна.

LEEP/Кольпоскопийн уг сургалтад эмч, сувилагч нар хамрагдсанаар умайн хүзүүний хорт хавдрыг эрт үед нь илрүүлж эмчлэх эмчилгээний арга аргачлалыг эзэмшиж, бусад улс орны эмч мэргэжилтнүүдтэй туршлага солилцон, ур чадвараа дээшлүүлэх боломж бүрдэж байгааг зохион байгуулагч нар онцлов.

Сургалтад Филиппин, Камбож, Кирибас, Лаос, Папуа Шинэ Гвиней, Соломоны Арал, Вануату, Вьетнам зэрэг Ази номхон далайн бүсийн улс орнууд болон Монгол Улсаас аймаг, дүүрэг, лавлагаа шатлалын нийт 52 мэс заслын, эмэгтэйчүүдийн эмч, сувилагч мэргэжилтэн хамрагдаж байна.