“Соёлын сэргэлт – 2023” аяны нээлт өнөөдөр Өвөрхангай аймгийн Хөгжимт драмын театрт боллоо.
Үндэсний нэгдмэл үнэт зүйлийг бэхжүүлэх, бүх нийтийн соёлын боловсролыг дээшлүүлэх, соёлын салбарын ажилтнуудыг чадавхжуулах, соёл урлагийн үйлчилгээний чанар, хүртээмжийг нэмэгдүүлж, соёлын үрийг тарих нь тус аяны зорилго бөгөөд Соёлын яамнаас орон даяар зохион байгуулж байна.
Өвөрхангай аймаг бол үзэсгэлэнт байгальтай, баялаг өвтэй, Монголын төдийгүй хүн төрөлхтний түүхэнд тодрон гарсан алдартнууд олонтой бүтээн туурвихын эрчис хурсан онцгой газар нутаг билээ.
Үйл ажиллагааг нээж Соёлын дэд сайд М.Батбаяр: Өврийн сайхан хангай нутгийн нэрийн хуудас болсон үнэт зүйлсээ хамгаалан, хөгжүүлж, нийт хүн төрөлхтний үнэт зүйлсийн орон зайд үнэлэмж өндөр байлгахын төлөө хариуцлагатай хүчин чармайлт нэн чухал хэмээв.
“Монгол Улсыг дэлхий нийт юугаар таньж мэдэх вэ гэдгийг бид бодож үзэх ёстой. Эзэн Чингис хааны дайлаар мордсон түүхэн үйл хэргийн дараа Өндөр гэгээн Занабазарын туурвисан соёл урлагийн гайхалтай бүтээлүүдийг дэлхий нийтээр хүлээн зөвшөөрч, Монголчуудыг сонирхон судалж байдаг. Улаанбаатар хотод байгуулсан Их Эзэн Чингис хааны музейгээр ороход Монгол хүн болж төрсөндөө омогшихгүй байхын аргагүй. Өв уламжлал, соёл урлаг гэдэг ийм хүчтэй хэмээн аймгийн Засаг дарга А.Ишдорж хэлсэн үгэндээ онцоллоо.
Аяны нээлтээр ЦЕГ-ын “Сүлд” чуулга болон Улсын филармонийн уран бүтээлчид тоглолтоо хүргэж, МЗЭ-ийн орлогч дарга, хэл шинжлэлийн ухааны доктор П.Нямлхагва “Монгол хэл Монголыг бүтээх нь” сэдвээр соён гэгээрлийн сургалт явуулсан юм.
Мөн энэ үеэр аймгийн Соёл урлагийн газраас зохион байгуулсан “Нэг ном эрхэм үйлс”, “Сумын бүжиг 2023” аянуудын шилдэг оролцогчдод шагнал гардууллаа.
Соёлын сэргэлт-2023 аяны хүрээнд 5-р сарын 16-27-ны өдрүүдэд Өвөрхангай аймгийн 18 сумдаар, соёлын салбарын ажилтнууд, сумдын соёлын төвийн удирдлага, албан хаагчид, ард иргэдэд чиглэсэн чадавхжуулах сургалтыг зохион байгуулах юм.
Өвөрхангай аймгийн хувьд 118 мянган хүн амтай. тус бүс нутагт өнөөдрийн байдлаар Хөгжимт драмын театр, Музей, Нийтийн номын сан, Соёлын төвүүдийн Төрийн үйлчилгээнд соёл урлагийн 123 албан хаагчид ажиллаж байна. Эдгээр орон нутгийн төлөөллүүд “Соёлын сэргэлт” аянд идэвх санаачлагатай оролцож байна.
Сэтгэгдэл