ЯРУУ НАЙРАГЧ, ЗОХИОЛЧ Г.АЮУРЗАНА: ЗҮГЭЭР Л ҮҮРГЭЭ ГҮЙЦЭТГЭХЭД АУГАА ИХ ҮЙЛС БОЛДОГ ТИЙМ АЖИЛ ХАРИУЦАЖ ЯВАА ХҮМҮҮС МӨН АЗТАЙ ЯА

-Сайн байна уу? Цаг гарган ярилцаж байгаа танд маш их баярлалаа. Таны уран бүтээлийн олз омог хэр арвин байна?

-Сайн. Сайн байна уу? Одоо нэг шинэ роман дээр сууж байна.

-Унших, бичихэд хэр их цаг зарцуулж байна?

-Ер нь хамаг цагаа зарцуулчих санаатай. Гэхдээ удтал хөдөлгөөнгүй сууснаас болоод нуруу хөшиж чилж өвддөг болсон. Харин нохой тэжээж эхэлснээс хойш овоо ойр зуур орон гаран ажилтай болчихоод байна.

-Эр хүн болгонд цэрэгтэй холбоотой дурсамж байдаг. Цэргийн хүний тухай анхны сэтгэгдэл хэзээ төрж байв?

-Миний бага нас цэрэг хүнийг дээдэлж хүндэлдэг цаг үед өнгөрсөн. Бараг л ухаан ороод анх биширсэн хүмүүс бол дүрэмт хувцастай эрчүүд байсан.

-Багадаа цэргийн хүн болъё гэж мөрөөддөг, байлдаантай кино үзэж, байлдаж тоглодог хүүхэд байв уу, эсвэл...?

-Цэрэг хувцас өмсөхийг мөрөөддөггүй, байлдаантай кинонд донтдоггүй хүүхэд гэж бидний үед огт байгаагүй. За, тэгээд тольтой суран бүс, тоглоомын буу бол жинхэнээсээ өдрийн бодол, шөнийн зүүд байлаа шүү дээ. Орост сурч байсан нагац ах минь намайг зургаан настай байхад цэнхэр өнгийн автомат буу авчирч өгсөн нь миний энэ насанд тохиолдсон хамгийн том баярын нэг байв. Хоёр ширхэг том зай ордог, гохыг нь дарахаар тачигнаж дуугараад урд нь гэрэл анивчдаг, янзын эд байж билээ. Хожим нь цэрэгжлийн хичээл миний хамгийн дуртай хичээл болсон. АКМ-г би норматив хугацаанаас нь хамаагүй хурдан задалдаг байсан. Бас “Дөл” гээд нэг уралдаан болдог, тэр тэмцээний хүрээнд ХБХБ тэмдгийн норм биелүүлэх гээд сүртэй юм болдог байв. Турникт найм суниах ёстой. Би нэг дор арван зургаа суниаж, чаддаггүй хүүхдийн өмнөөс ангийнхаа оноонд нэмэр болдог байснаа санаж байна.

-Бид эх орон, хил хязгаар, уран бүтээлийн талаар ярилцах болохоор анх хилийн дээс алхаж байсан үеийн дурсамжаар яриагаа үргэлжлүүлье. Эх орныхоо хил хязгаарыг анх үзээд танд ямар сэтгэгдэл төрж байв?

-1988 онд Москвад суралцахаар явсан. Галт тэрэг шөнөөр хил гардаг, бас хил гарах үед хөшгөө буулгахыг шаарддаг байсан тул цэрэг, гаалийн ажилтнуудаас өөр юу ч хараагүй. Өглөө босоход цонхоор Байгаль далайн хөвөө цэлэлзэж байж билээ.

-Анх М.Горькийн нэрэмжит утга зохиолын дээд сургуульд суралцахаар эх орноосоо гарч, эрт цагт Монголын нутагт харьяалагдаж асан түүхэн газрын гудамжаар алхаж явсан нь цэл залуухан зохиолч Г.Аюурзанын хувьд “Тверийн бульвар”-аа бичих үүдэл байжээ. Москва хот, оюутны амьдрал дунд хайрламаар дурсамж олон биз. Та манай уншигчидтай хуваалцахгүй юу?

-Залуу насныхаа цөөнгүй жилийг тэнд өнгөрөөсөн болохоор Москвад их хайртай. Сайхан хот шүү дээ. За, тэгээд залуу явна аа гэдэг өөрөө ямар ч газар орныг онцгой болгох ид шид юм даа. “Амь тавьж буй шувууны далавч”-аа би оюутан цагийнхаа дурсамжаар бичсэн.

-“Сэтгэл зүрхний минь нийслэл харийн саарал хот” хэмээн таны зохиолын нэг гол баатар өгүүлдэг. Таны хувьд Москва ийм сэтгэгдэл төрүүлж чадах байх?

-“Арван зүүдний өр”-ийн тухай шүүмж бичсэн Оросын нэг судлаач “саарал хот гэхээр чинь Санкт-Петрбург л гэж бодлоо” гэж хэлж байсан. Москва соц үедээ саарал барилгаар дүүрэн байсан. Тэнгэр нь намар оройноос эхлээд хавар болтол бүрхэг. Аравдугаар сард, оросуудын “бабье лето” гэж нэрлэдэг зурвасхан үед нар гараад, тэгээд голдуу бүрхэг өвөлжинө шүү дээ. Гэхдээ хамаг мөрөөдөл, шаналал, баясал минь тэнд хамгаас хүчтэй оргилсон юм шиг санагддаг учраас залуу насны минь зүрхний нийслэл гэмээр хот бол яах аргагүй Москва.

-Хойно сурч байсан цэл залуу зохиолчийн хүсэл мөрөөдөл юу байв?

-Яруу найргийн дээд түвшин. Ерөөсөө би ганцхан л зүйлээр амьсгалж, амьдарч явсан.

-Өнөөдөр тэр хүсэл мөрөөдөл биелсэн гэж та боддог уу?

-Би бусдад биш, өөртөө зориулж шүлэг бичдэг. Бусдад юу гээд хэлэгдчих бол гэж боддоггүй, өөртөө үнэнч явахаа эрхэмлэдэг. Хар залуугаасаа бичсэн бүх шүлгээ энэ жил эргэн харж шилмэл түүврээ эмхлээд, сүүлийн үед бичсэн шинэ шүлгүүдтэйгээ хамт дэвтэрлэж саяхан гаргалаа. “Бясалгал” гэдэг ном гарсан. Бараг л нэг насныхаа ажлыг өөрийнхөөрөө дүгнэсэн минь тэр. Хүрье гэж зорьсондоо би хүрч чадсан гэж өөртөө бардам хэлнэ.

-Эрч хүч, дэврүүн хүсэл мөрөөдлөөр дүүрэн эргэж ирсэн залуу насны он жилүүд хэрхэн өнгөрөв? Гэр бүл, ажил төрөл гээд амьдралын анхны юм бүхэн давхцаж байсан биз ээ.

-Хамгийн сайн шүлгүүдээ би 24 наснаасаа хойш бичиж эхэлсэн юм билээ. Хамгийн сайн шүлгүүд, хамгийн сайн эхнэр, хамгийн хөөрхөн хүүхдүүд, төсөөлж ч байгаагүй аз жаргал. Эргээд бодоход, залуу нас дэндүү хурдан дуусчихдаг эд юм. Одоо би хөгширчихөөгүй байгаа ч, хэн ч намайг залуу гэж хэлэхгүй. Гунигтай ч юм шиг. Гуниглах хамгийн том шалтгаан нь хайран цагийг дэмий үрсэн тохиолдол дэндүү их байжээ.

-Та “Чөлөөт цагаараа өөрийнхөө амьдралаар амьдардаггүй” цөөхөн хүний нэг. Таны амьдралын зарчим хэзээ анх бүрэлдэн тогтсон, түүнд юу хамгийн их нөлөөлсөн бэ?

-Надад уран зохиолоос өөр шимтэх юм үнэндээ байгаагүй. Тиймээс өөр зам, өөр сонирхол, өөр шунал байж болно гэж төсөөлж явсангүй. Ийм үзэлтэй болоход нөлөөлсөн зүйл бол ном.

-Амьдралын хором бүрийг үнэ цэнтэй байлгадаг хүний хувьд амьдрал үнэхээр хайрламаар сайхан зүйл мөн үү?

-Тийм ээ, энэ бол гайхамшиг. Бид хүн болж төрсөн, хэн нэг маань хил дээр үндэс угсаа нэгтнийхээ орон зайг хамгаалж, хэн нэг маань дуу зохиож, хаа нэгтээ бүсгүй хүн хүүхэд төрүүлж байна гэдэг бол гайхамшиг. Хөдөөний ядуу жаал ном бичиж, түүнийг нь огт танихгүй хүмүүс уншаад, зарим нь номоор минь дамжуулаад намайг ойлгож, магадгүй хайрлаж байна гэдэг гайхамшиг. Бас зарим нэг хүн надад атаархсандаа ч юм уу намайг зүгээр шүлэг зохиол бичдэгийн минь төлөө адлан доромжилж, гүтгэн муучилж байна гэдэг ч мөн гайхамшиг. Амьдрал гэж ийм сайхан зүйл шүү дээ.

-Эх орны тусгаар тогтнол, үнэ цэнийн талаарх таны бодлыг сонирхъё?

-Эх орон гэдэг бол хийсвэр ойлголт биш, лоозогнох төдий хоосон үг биш. Улс төрчдийн хөзөр, яруу найрагчдын тайзнаас хашгирдаг панаал биш. Эх орон гэдэг бол ухамсартай хүн бүхний хувьд “Чи хэн бэ?” хэмээх шалгуур нь. Эх орноо гэх сэтгэлгүй бол тэгээд чи дуусаа. Чамайг дэмий төрүүлж, буруу хүмүүжүүлж, бүр адгийн новш болгож хаяжээ гэсэн үг. Эх орон гэдэг зөвхөн газар шороо, ард түмэн, гэр орон, үр хүүхэд биш. Энэ бол энэ газар шороон дээр түмэн үеэ элээсэн хүмүүсийн итгэл найдвар, сайхан мөрөөдөл, туулж ирсэн амьдрал, бүтээсэн соёл, бас монгол хэл юм. Бид монголоороо ярьдаг, монголоороо ойлголцдог, монголоороо амьдардаг азтай хүмүүс. Дэлхий дээр өчнөөн сая монголчууд эх хэлээрээ ярьдаггүй, яриад ч бие биеэ төдийлөн сайн ойлгодоггүй, монгол гэдгээрээ бахархах биш харин ад үзэгдэж яваа. Гэхдээ чухам тэд байсны ачаар л, тэд бидний өмнөөс золиос болсны хүчээр Монгол Улс гэж өнөөдөр оршиж байгааг би ямагт санаж явдаг. Тиймээс би өвөрмонгол, буриад хүмүүсийг үнэн сэтгэлээсээ хайрладаг. Тэд хэл соёлоо гээж байгаа нь үнэн. Гэхдээ тэдний буруу биш. Тэд бол бидний төлөө золигдсон хүмүүс.

-“Харийн нутаг”, “Хүний газар” хэмээх ойлголтыг та хэрхэн хүлээж авдаг вэ? “Харийн нутаг давчдах” үе гарч байв уу?

-Уран зохиолын буянаар би дандаа сайхан хүмүүстэй уулзаж, сайн хүмүүстэй таарч явсан. Би аль ч газар оронд явсан, үргэлж сайн сайхныг нь олж харж чаддаг.

-Эх орноосоо гарч харь газар одоод, эргэж ирэх бүрт танд ямар сэтгэгдэл төрдөг вэ?

-“Дэнж гоёсон гэртээ ирлээ” гээд Эрдэнэбат гавьяатын дуулдаг нэг сайхан дуу бий. Тэр дууг сонсох бүрт сэтгэл амраад явчихдаг юм. Ийм мэдрэмжийг одоо яаж ч илэрхийлмээр юм бэ дээ? Гэр орон гэж гоё хоршоо үг шүү. Гэр орон, эх орон, эх нутаг. Сүүлийн үед би Монголоос өөр хаана ч жаргалтай байж чадахгүйгээ улам сайн мэддэг болсон.

-Анх яруу найрагт яагаад хөл тавих болов? Хүсэж мөрөөдөж асан тэр зүйлээ олж авч чадсан уу?

-Хүүхэд насандаа ангийнхаа охинд дурлаад, тэгээд санаандгүй Явуухулангийн шүлгүүдийг олж уншсан. Ингээд л архинд орсон хүн шиг болчихсон доо. Уран зохиол, яруу найрагтай холбоотой амьдрах ёстойгоо ойлгосон ч гэх юм уу...

-Яруу найрагч хүнд ямар үечлэлүүд байдаг гэж та боддог вэ?

-Ёстой бодож үзээгүй юм байна. Мэдээж, анхны гэнэн цагаан шүлгүүдийн үе гэж байх болов уу. Ихэнх хүн тийм маягаар шүлэг тэрлэж байгаад, буурь суумагцаа орхичихдог юм гэнэ лээ. Би бол буурь суух нь байтугай, бүр хэтрээд явчихсан. Яваа яваандаа бага сага дөр суусаар, гуч орчим насандаа би өөрийгөө яруу найрагч гэж нэрлэж зүрхэлдэг болсон.

-Таны “Бясалгал” хэмээх шинэ шүлгийн түүвэр хэвлэгдэн гарсан даруйдаа уншигч олны ширээний ном болсон. Үүнтэй зэрэгцэн “Яруу найрагчийнхаа хувьд зодог тайлж байна” гэсэн гарчигтай ярилцлага нийтлэгдсэн байх юм. Яагаад ийм шийдвэр гаргах болов?

-Сүүлийн нэг жил би шүлэг бичээгүй. Өмнө нь надад ийм зүйл тохиолдож байсангүй. Тэгэхээр шүлэг бичихээ болих нас гэж бас байдаг гэлцдэг нь үнэн бололтой. Нэгэнт  бичигдэхгүй, санаанд мөр шад орж ирэхгүй байхад хөөцөлдөөд яах юм бэ? Одоо хүүрнэл зохиолдоо бүх бодлоо чиглүүлье гэж шийдчихсэн чинь бүр сэтгэл амарчихсан.

-Яруу найраг бол таны хувьд хамгийн чухал, магадгүй амьдралаас хамгийн их хайрласан зүйл тань байх. Яруу найрагт зориулдаг эрч хүчийг юунд зориулж, тэр том орон зайг юугаар нөхөх вэ? Таны үргэлжилсэн үгийн зохиолууд нөхөж чадах болов уу?

-Чадна гэдэгт эргэлзэхгүй байгаа. Хэлбэр нь л өөр болохоос угтаа эд чинь нэг л юм.

-Таны хамгийн олон дахин хэвлэгдсэн бүтээл?

-“Шинэ үеийн номын сан” цувралын хар номууд. “2х2=6”-г хэд ч хэвлэсэн юм бэ, мэдэхгүй. Би өөрөө л лав 30-40 мянга гаргасан байх. Мэр сэр хулгайч нар ч бас нууцаар хэвлүүлж зарсан байдаг. Романуудаас бол “Гурамсан цадиг” байх аа. “Бөөгийн домог” ч юм уу?

-Шавьтай болъё гэж боддог уу?

-Үгүй чиш. Би юугаа заах вэ? Миний номуудыг уншихад л надаас илүү би тэнд байгаа.

-Уйтгар гуниг, ганцаардлын мөн чанар юу вэ?

-Өөр рүүгээ өнгийх хамгийн том боломж.

-Та философич хүнийхээ хувьд өөртөө хэр сэтгэл хангалуун байдаг вэ?

-Би өөрийгөө философич гэж хэлж зориглохгүй. Гэхдээ амьдралыг мөн ч өрөвдөлтэй гэнэхнээр харж байгаа, улс төр гэх мэт аахар шаахар зүйлс рүү тэч ядан үсчсэн зарим нэг нөхөд өөрийгөө ийм том үгээр цоллож зарлаад явахыг хараад, тэдний дэргэд би философи ойлгодог хүн юм биш үү? гэж бодогдох удаа гардаг л юм.

-Таны бүтээлээр кино, эсвэл жүжиг хийх санал ирж байсан уу?

-“Хэвтрийн хүн”-ээр кино хийнэ гээд найруулагч Бямбаа хэдэн жил яриад яваа. Жинхэнэ кино урлаг гэж юу байдгийг үнэхээр ойлгочихсон, сайн уран бүтээлч учраас Бямбаа ах тэр киногоо барьж аваасай гэж боддог. Киноны сургуулийн залуус “Хар ая” гээд нэг өгүүллэгээр хоёр ч янзын богинохон кино хийчихсэн, надад үзүүлж байсан. Сүүлийн үед “Бөөгийн домог”-оор кино хийе гэсэн хоёр ч санал ирсэн. Нэг нь буриадууд, нөгөө нь монгол залуус байгаа.

-Та Монголын уншигчдыг “Шинэ үеийн номын сан”-тай болголоо. Яруу найраг бол “Болор цом”-оос тэс өөр зүйл гэдгийг ойлгууллаа. Гадаадын утга зохиол энд, харин манайх тэнд гэдгийг тодорхойлж өглөө. Энэ бүхэн таны цуврал хар номууд, антологууд, орчуулгын бүтээлүүд болон “Балчир шүлэг”-ээс эхлээд “Бясалгал”-ыг хүртэлх яруу найргийн түүвэр, “Ганцаардлын дасгал” номын өмнөтгөлд бичсэн өмнөх үгээс харагддаг. Одоо та юунд зорьж тэмүүлж явна вэ?

-Сайн сайн, жинхэнэ түвшний романууд бичихийг л.

-Эх орны хил хязгаарт үүрэг гүйцэтгэж байгаа манай хилчдэд оюун санааныхаа хил хязгаарыг тэлэх хэр их боломж байгаа гэж та үзэж байна?

-Ер нь уншиж байж хүний бодол санааны цар тэлдэг юм шүү дээ. Ном уншдаггүй хүнтэй ярих  сэдэв олддоггүй. Ан гөрөө, хүүхэн шуухан, архи дарсны паян ярьсаар яваад насаа бардаг хүмүүс зөндөөн бий, өөрсдөд нь сайхан байдаг биз. Гэхдээ энэ бүхэн чинь утгагүй шүү дээ. Ан гөрөө хийсэн ч утга учиртай, архи уусан ч голтой хүмүүс байдаг. Ялангуяа ном уншдаг, юм боддог хүмүүс тийм байдаг шүү дээ. Тийм хүмүүсийн амьдрал дүүрэн, хавь орчныхон нь ч бусдад гай тарихааргүй болж төлөвшдөг.

-Та хилчдийн талаар ямар бодол, төсөөлөлтэй байдаг вэ?

-“Хил манаагүй эрийг эр гэдэг юм уу?” гээд манай нутгийн өвгөн ах Тангадын Галсангийн нэг мөр бий. Сайхан үг шүү.

-Яг одоо хилийн застав хэмээх нам гүм, аниргүй орчинд хилчид маань суугаад бидний ярилцлагыг уншиж байгаа. Та тэдэнд хандаж юу хэлэх вэ?

-“Зүгээр л үүргээ гүйцэтгэхэд аугаа их үйлс болдог тийм ажил хариуцаж яваа хүмүүс мөн азтай яа. Та нарын үүрэг ийм л гайхалтай зүйл шүү дээ, хилчид минь” гэж хэлмээр байна.

-Баярлалаа. Танд уран бүтээлийн од, хийморь ерөөе. Хилийн бяцхан салбарт хүрэлцэн ирэх боломж хэзээ нэгэн цагт гарах байх. Хилчид бид таныг талархан угтах болно. Ингэхэд таны ярилцлагатай хамт аль нэг шүлгээс тань оруулж болох уу?

-За тэгвэл үүнийг оруул даа.

Л.Ө.

You’re my reality. I’m your mirage. Paul Celan

Аньсагыг минь бүлээцүүлж нарны гэрэл шиг төөнөхөд чинь сэрсэн ч гэлээ,

Гялбахгүйн тулд би урд насандаа нүдээ нээгээгүй юм.

Алган дээр минь шувуу шиг үүрээ засахыг чинь

Харахын тулд би хойт насандаа мод болно.

Нүдээ нээгээгүй ч гэсэн, яг л энэ дүрээрээ

Нүүрнээсээ инээд сацруулан зогсохыг чинь үзсэн.

Мартахгүйн тулд би мөнхийн санагалзлаараа

Манант он жилүүдийн төгөлд тэмдэг тавьсан.

Учирсан дороо чамайг таниад, өлмийд чинь

Навчис дэвсэхийн тулд би хойт насандаа мод болно.

Намайг ахиад л иржээ гэдгийг мэдрээрэй!

Намар байх болно.

 

 Хошууч Ж.ОЮУН-ЭРДЭНЭ

"ТЭД БА БИД" номын хоёрдугаар дэвтэрээс



АНХААРУУЛГА: Уншигчдын бичсэн сэтгэгдэлд deed.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан бөгөөд мөн IP хаяг ил гарсан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Сэтгэгдэл




ШИНЭ МЭДЭЭ

Улсын Их Хурлын ес дэх сонгуулиар шинээр сонгогдсон гишүүд тангараг өргөж, Улсын Их Хурлын даргыг сонголоо7-2, 18:31УИХ-ын дарга Д.Амарбаясгалангийн Улсын Их Хурлын анхдугаар чуулганд хэлсэн үг7-2, 18:04Монгол Улсын Ерөнхийлөгч Улсын Их Хурлын чуулганыг нээж үг хэллээ7-2, 17:43Ерөнхийлөгч У.Хүрэлсүх УИХ-ын сонгуульд суудал авсан нам, эвслийн удирдлагыг хүлээн авч уулзлаа7-1, 21:16Монгол Улсын Ерөнхийлөгчид УИХ-ын 2024 оны ээлжит сонгуулийн дүнг өргөн мэдүүллээ7-1, 21:12Сонгогч та сонгогчийн нэрийн жагсаалтад бүртгэлтэй эсэхээ шалгаарай6-11, 20:33Бүгд Найрамдах Ардчилсан Лаос Ард Улсын Ерөнхийлөгч Тонглун Сисүлит төрийн айлчлал хийхээр хүрэлцэн ирлээ6-11, 17:04“Монгол Улсын Үндсэн хуулийн цэцийн гишүүнийг томилох, чөлөөлөх тухай” УИХ-ын тогтоолын төслийг баталж, хуулийн төслүүдийн эцсийн хэлэлцүүлгийг хийв5-30, 15:44Биеийн тамир, спортын тухай хуулийн шинэчилсэн найруулгын төслийг эцэслэн хэлэлцлээ5-30, 15:09Бүгд Найрамдах Филиппин Улсын Гадаад хэргийн яамны НҮБ болон олон улсын байгууллагын асуудал хариуцсан Туслах Төрийн нарийн бичгийн даргыг хүлээн авч уулзав5-29, 17:09“НҮБ-ЫН ТӨРӨЛЖСӨН БАЙГУУЛЛАГЫН ЭРХ ЯМБА, ДАРХАН ЭРХИЙН ТУХАЙ КОНВЕНЦ”-ЫН XV ХАВСРАЛТЫГ СОЁРХОН БАТЛАХ ТУХАЙ ХУУЛИЙН ТӨСЛИЙГ ӨРГӨН МЭДҮҮЛЭВ5-29, 17:07БНСУ-ААС МОНГОЛ УЛСАД СУУХ ЭЛЧИН САЙД ИТГЭМЖЛЭХ ЖУУХ БИЧГЭЭ ӨРГӨН БАРИЛАА5-29, 17:03Үерийн аюул, гамшгаас урьдчилан сэргийлэх арга хэмжээ авч, бэлтгэл хангаж ажиллахыг үүрэг болголоо5-29, 16:34ШИВЭЭХҮРЭН-СЭХЭЭ БООМТЫН ХИЛ ДАМНАСАН ТӨМӨР ЗАМЫН БҮТЭЭН БАЙГУУЛАЛТ ДУУСЛАА5-29, 16:29ЖИЛД 20 САЯ ТОНН НҮҮРС АЧИХ ХҮЧИН ЧАДАЛТАЙ “ТАВАНТОЛГОЙН НҮҮРС АЧИХ ЛОГИСТИКИЙН ТӨВ” АШИГЛАЛТАД ОРЛОО5-29, 16:20Төсвийн байнгын хорооны тогтоолын төслийг батлав5-28, 15:52“SD70ACe/LW ЗАГВАРЫН 6 ШИНЭ ЗҮТГҮҮР”-ИЙГ ТЭЭВЭРЛЭЛТЭД НЭВТРҮҮЛЖ, ХӨДЛӨХ БҮРЭЛДЭХҮҮНИЙ ЗАСВАРЫН ТӨВ АШИГЛАЛТАД ОРЛОО5-28, 13:51“Цагаан алт” хөтөлбөр малын гаралтай түүхий эдийг үнэ цэнтэй болгоно5-28, 13:43“Засгийн газрын хүний нөөцийн бодлогыг дэмжих цахим систем”-ийг хэрэглээнд нэвтрүүллээ5-28, 13:29Сонгинохайрхан, Налайх дүүрэгт эдийн засгийн тусгай бүс байгуулна5-22, 16:47Худалдан авсан автобусны техникийн үзүүлэлт сэдвийн хүрээнд 2 сэдвээр нотлох баримтыг шинжлэн судална5-22, 13:17Говь, тал, хээрийн нутгаар салхи, шороон шуургатай байхыг анхааруулж байна5-22, 13:13Ерөнхийлөгч У.Хүрэлсүх Цөлжилттэй тэмцэх тухай НҮБ-ын конвенцын Гүйцэтгэх нарийн бичгийн даргыг хүлээн авч уулзав5-21, 22:0835 дахь удаагийн Номын баяр 05 дугаар сарын 18-нд нээлтээ хийнэ5-17, 22:54Алба хаагчдад төрийн дээд одон, медаль хүртээлээ5-17, 22:41Ахлах ахлагч Д.Тэмүүжин “Онцгой байдлын албаны анхны сайдын нэрэмжит шагнал”-ыг хүртлээ5-17, 22:39Цэргийн ёслол, хүндэтгэлийн ёслолын жагсаалд 1600 орчим алба хаагч, тусгай албаны техник хэрэгсэлтэйгээр оролцлоо5-17, 22:37Онцгой байдлын байгууллагын сүлд хийморь эгнэгт мандан бадрах болтугай5-17, 22:36МОНГОЛ УЛСАД ГАДААД ХУДАЛДААГ ДЭМЖИХ ТӨСЛИЙН НЭЭЛТ БОЛОВ5-16, 17:30“БИЗНЕС БА ХҮНИЙ ЭРХ” СЭДЭВТ БҮС НУТГИЙН СЕМИНАРЫГ УЛААНБААТАР ХОТНОО ЗОХИОН БАЙГУУЛАВ5-16, 17:29УИХ-ын дарга Г.Занданшатар төрийн албан хаагчдыг парламентын “D-petition” цахим системийг сурталчилж ажиллахыг хүслээ5-16, 17:25Онцгой байдлын байгууллага "Алба сурталчлах" өдөрлөгийг зохион байгууллаа5-16, 16:35Ерөнхий сайд Л.Оюун-Эрдэнэ Үндэсний орон сууцжуулалтын тухай хуулийн төслийг өргөн мэдүүлэв5-16, 16:00УИХ-ын дарга Г.Занданшатар ЮНИДО-гийн Монгол Улсыг хариуцсан төлөөлөгч Стефэн Каргбо-г хүлээн авч уулзав5-14, 20:02Монгол Улсын Ерөнхийлөгч У.Хүрэлсүх БНСВУ-ын Элчин сайдыг хүлээн авч уулзав5-14, 19:55Олон хүүхэд төрүүлж өсгөсөн эхийг урамшуулах тухай хуульд нэмэлт оруулах тухай хуулийн төсөл өргөн барив5-14, 19:54Ерөнхий сайд Л.Оюун-Эрдэнэ Хот, тосгоны болон Шинэ Зуунмод хотын эрх зүйн байдлын тухай хуулийн төслүүдийг өргөн барилаа5-3, 11:08Үндэсний баялгийн сангийн тухай хуулийг хэрэгжүүлэх Засгийн газрын тогтоолыг баталлаа5-1, 11:04Шинжлэх ухаан, технологийн тухай хуулийн шинэчилсэн найруулгын төслийн анхны хэлэлцүүлгийг хийв4-30, 18:23НББХ-ны дарга П.Анужин ДЭМБ-ын Номхон далайн баруун бүсийн захирал Др.Сайа Мау Пиукалаг хүлээн авч уулзлаа4-30, 18:18