Хөгжлийн банкны зөрчлийг нийтэд ил болголоо
УИХ дахь МАН-ын бүлэг бүлгийн хуралдаанаараа Хөгжлийн банкны үйл ажиллагаанд хийсэн шалгалтын үр дүнд 1.3 их наяд төгрөгийн зөрчилтэй байгаа асуудлыг хэлэлцсэн юм.
Улмаар Хөгжлийн банкаар илэрсэн зөрчилтэй асуудлыг нийтэд ил болгосон юм. Тодруулбал, Анх Хөгжлийн банк 6.9 их наяд төгрөгийн активтайгаас нийт зургаан их наяд төгрөгийг зээлээр олгосон байна. Өнөөдрийн байдлаар 202 тэрбум төгрөгийн өөрийн хөрөнгөтэй байгаа аж. Нийт зээлийн 69.6 хувь нь хугацаа хэтэрсэн, чанаргүй зээл нь 13.8 хувийг эзэлж байгаа гэнэ. Ойрын гурван жилийн хугацаанд гаднаас авсан зээлийн эргэн төлөлтөд 3.7 их наядыг төлөхөөр болжээ.
Энэ талаар УИХ-ын гишүүн Ж.Энхбаяр "Ингэхдээ эргээд зээл олгосон аж ахуйн нэгжүүдээс 2.2 их наядыг татан авах ёстой. Үүний зөрүүнд зээлийн эргэн төлөлтөөс 1.5 их наядын дутагдал үүсч байна. Гэтэл улсын төсвөөс буюу төсвийн орлогоос эргэн төлөгдөх ёстой зээлийн хуваариуд 1-4 удаа хойшилсон байна. Тухайн зээлийн 54.3 хувь нь буюу 3.2 их наяд төгрөгийг улсын төсвөөс эргэн төлөгдөх нөхцөлөөр 371 төсөлд зарцуулжээ. Нийт зээлийн 28.3 хувь болох 1.7 их наядыг Хөгжлийн банк 16 төсөлд зарцуулахдаа улсын үйлдвэрийн найм, хувийн найман төсөлд зарцуулсан байна. Мөн арилжааны банкуудаар дамжуулан нийт зээлийн 17.3 хувь буюу нэг их наяд төгрөгийг 1619 төсөлд олгосон байна" гэсэн юм.
Ерөнхийлөгч Ц.Элбэгдорж утааны асуудлаар мэдээлэл өгөв
Монгол Улсын Ерөнхийлөгч Ц.Элбэгдорж сэтгүүлчидтэй уулзав. Уулзалтаараа "Нийслэл хотын агаар, орчны бохирдлын асуудлыг Үндэсний аюулгүй байдлын зөвлөл өргөтгөсөн хурлаар авч хэлэлцсэн. Хуралдаанд төрийн өндөрлөгүүд, сайдууд, УИХ-ын гишүүд оролцсон. Мөн орчны бохирдлын чиглэлээр ажилладаг мэргэжилтнүүд, нийслэлийн удирдлага оролцсон. Монгол Улсын төрийн тэргүүний хувьд энэ хурлаас ямар шийдвэр гарсан, цаашид ямар арга хэмжээ авах гэж байгаа талаар мэдээлэл өгөх гэж байна" хэмээн ҮАБЗ-өөс гаргасан зөвлөмжийн талаар мэдээлэл өгсөн юм. Тэрбээр мэдээллэээрээ Улаанбаатарын утааны асуудлаар хэлж, ярьж үүрэг зөвлөмж өгч байсан ч өнөөдөр болтол утааны асуудал хэвээрээ байна. Мөн утааны бүсийг ногоон байгууламж болгож, сэтгүүлчдийн утааны асуудлаар байнга нийтлэл, сурвалжлага, мэдээ бэлтгэж байхыг зөвлөсөн юм.
Шинэ Үндсэн хууль батлагдсаны 25 жилийн ой боллоо
Монгол Улсын шинэ Үндсэн хууль батлагдсаны 25 жилийн ой боллоо. Ойн хүрээнд Ардын Их Хурлын депутатуудад хүндэтгэл үзүүлж, Жанжин Д.Сүхбаатарын хөшөөнд цэцэг өргөн, Их эзэн Чингис хааны хөшөөнд хүндэтгэл үзүүлсэн юм. Мөн Монгол Улсын Хөдөлмөрийн баатар, Ардын багш, гавьяат хуульч Б.Чимидийн нэрэмжит шагнал гардуулах ёслол болов.
Монгол Улсын Их Хурлын даргын 2014 оны 176 тоот захирамжаар батлагдсан “Б.Чимидийн нэрэмжит шагнал олгох тухай” журам, Монгол Улсын Их Хурлын даргын 2017 оны 01 дүгээр сарын 09-ний өдрийн “Шагнал олгох тухай” 08 дугаар захирамжийг үндэслэн Монгол Улсын их сургуулийн Хууль зүйн сургуулийн Нийтийн эрх зүйн тэнхимийн эрхлэгч, хууль зүйн шинжлэх ухааны доктор, профессор Должингийн Баярсайханы “Эрх зүйн онол” бүтээлд төр, нийгмийн нэрт зүтгэлтэн, Монгол Улсын хөдөлмөрийн баатар, Ардын багш, Гавьяат хуульч “Бяраагийн Чимидийн нэрэмжит” 2017 оны Монгол Улсын Их Хурлын шагналыг хүртээж Өргөмжлөл, Б.Чимидийн дүрс бүхий медаль, мөнгөн урамшуулал олгож буйг Өргөмжлөлд дурджээ.
Авлигын эсрэг чууллаа
Авлигатай тэмцэх газар үүсэн байгуулагдсаны 10 жилийн ой болов. Ойн хүрээнд авлигатай үр дүнтэй тэмцэх чиглэлээр асуудал дэвшүүлэн, шийдвэрлэх арга замаа тодорхойлж, цаашид нийгмийн бүлгүүдтэй хамтран ажиллах зорилгоор “Авлигын эсрэг үндэсний чуулган” зохион байгуулав.
Үндэсний чуулган нь “Авлигатай тэмцэх эрх зүйн орчин, шүүх эрх мэдлийн болон хууль сахиулах байгууллагуудын хамтын ажиллагаа”, “Төрийн байгууллагын ил тод, шударга, хариуцлагатай байдал”, “Хувийн хэвшил дэх авлигаас урьдчилан сэргийлэх асуудал”, “Авлигаас урьдчилан сэргийлэх үйл ажиллагаанд олон нийт, хэвлэл мэдээллийн болон төрийн бус байгууллагын оролцоо” гэсэн 4 салбар хуралдаанаар үргэлжилсэн юм.
Хар тамхины хэрэгт холбогдсон прокуроруудад ял оноолоо
Хар тамхины хэрэгт холбогдоод байсан прокуроруудад ял оноожээ. Тодруулбал, Тээрийн прокурорын газрын хяналтын прокурор байсан Х.Тамир, ТЕГ-ын Мөрдөн шалгах хэлтэст ажиллаж байсан Б.Амарбаясгалан, Б.Сүхбаатар, Н.Мөнхбат нар 5-6 жилийн хорих ял оноосон байна.
Тэд 2015 оны долдугаар сард өмнөд хөршөөс ирж буй “бараа”-гаа авахаар Дорноговь аймгийн Замын-Үүд хилийн боомт дээр очоод байхад нь цагдаагийнхан баривчилсан байдаг. Тэднийг Эрүүгийн хуулийн тусгай ангийн 192.1, 192.2, 188.3, 269.1, 268.2, 272.2-т зааснаар буруутган ялласан юм.
Б.Анир
Сэтгэгдэл