Шинжихүй: Ардчилсан нам шиг овилгогүй намыг "гудамжнаас" удирдах хэцүү

Ардчилсан намын даргын төлөө өрсөлдөж буй эрхмүүдийг бид цувралаар танилцуулж байгаа билээ. Тэгвэл энэ удаагийн АН-ын даргад нэр дэвшигчдийг шинжихүй булангийн ээлжит зочин бол Л.Гантөмөр юм. Тэрбээр намын даргын сунгаанд оролцож буй залуучуудын нэг хэмээн ялгарч байгаа юм.

УИХ-ын гишүүнээр гурван ч удаа сонгогдсон түүний хувьд "хар" багаасаа намын дарга болох амбицтай байсан гэдэг. УИХ-ын сонгууль анх сонгогдсон даруйдаа л залуучуудын төлөөлөл энэ намын авч явах ёстой гэсэн байр суурийг илэрхийлсээр ирсэн байдаг юм. Харамсалтай нь тэрбээр энэ удаагийн сонгуульд ялагдалж хүлээж ордны амьдралаасаа түр татгалзаад байгаа.

Ер нь бол энэ намын даргын сонгуульд намаа шинэчилнэ гэж нэр дэвшиж байгаа эрхмүүдээс Л.Гантөмөр болон Н.Алтанхуяг хоёр "гудамжнаас" оролцож байгаа. Нам удирдана гэдэг хэцүү. Ялангуяа Ардчилсан намыг. Эрх мэдэл болон тойрон хүрээлэгчид байхгүй бол даргын суудалд удаан тэсч үлдэх үнэндээ бэрх. Л.Гантөмөр нэгдүгээрт УИХ-д сууж чадаагүй, хоёрдугаарт фракцаа тарааж баахан шоудсан. Энэ бүгдээс хамаараад намын даргад сонгогдох эсэх нь эргэлзээтэй юм. Мөн намын даргын суудлыг төлөө түүнтэй өрсөлдөж буй эрхмүүд бүгд хүчтэй байр суурьтай байгаа. Зарим сайтуудын судалгаануудыг харахад Л.Гантөмөр 3 эсвэл 4 дүгээр байранд л явж байх жишээтэй.

Эдгээрээс гадна УИХ-ын сонгуульд хэдхэн мянган хүний саналыг авч чадаагүй түүнд боломж гарах уу гэдэг л сонин болоод байна. Энэ бүгд нь түүний өнгөрсөн дөрвөн жилд боловсролын салбарыг хэрхэн удирдаж байсан бэ гэдгийн үнэлгээ гэж хэлж болох юм. Өнгөрсөн жилүүдэд боловсролтой холбоотой мүүн гэх ойлголт нийгмийг гайхшруулсан. Л.Гантөмөр сайдын багт ажиллаж байсан Б.Насанбаяр гэх эмэгтэй мүүнийн урсгалыг дэмждэг нэгэн гэж баахан хэрэг дэгдсэн. Улмаар Б.Насанбаяр нь ажлаа өгч уг хэрэг нэг цэгцэрсэн түүхтэй. Үүнээс гадны боловсролын системийг өнгөрсөн дөрвөн жилд үндэс сууриар нь дампууруулах ажлыг эхлүүлсэн гэдэг. Түүний бодлогоо хариуцуулсан мүүний шашны төлөөлөл гэх эмэгтэй нь Уран зохиолын хичээлийг боловсролын системээс хасна гэж баахан бужигнуулсан. Түүгээр ч барахгүй өнгөрсөн дөрвөн жилийн хугацаанд сурах бичгийн агуулга, боловсролын бусад асуудлуудтай холбоотой маш олон гомдол санал Л.Гантөмөрт хаягтайгаар ирдэг байсан гэдэг юм.

Ийнхүү хүлээсэн ажлаа хүлээлтэд хүртэл хийж чадаагүй. Тэрхүү үнэлгээг нь ард түмэн нь УИХ-ын сонгуулиар тавьчихсан Л.Гантөмөрт намын гишүүд нь итгэл хүлээлгэх үү гэдэг сонирхолтой. Мөн дээрээс нь нэмээд хэлэхэд өнгөрсөн жилүүдэд Ардчилсан нам дотор өрнөсөн бүхий л алдаа завхралын дунд тэр байсан. Өнөөдөр намаа шинэчлэх хэрэгтэй гэж яриад байгаа зүйлээ яагаад эртнээс ярьж болоогүй юм бол.

 Б.Анир