Манай орны нийт нутгийн 70 гаруй хувьд цасан бүрхүүл тогтож өнөөдрийн байдлаар 17 аймгийн 127 сум, нийслэлийн хоёр дүүрэгт өвөлжилт хүндэрсэн талаар Онцгой байдлын ерөнхий газраас мэдээллээ. Ялангуяа баруун, төв, зүүн аймгуудын зарим газраар, тал газраа 25-35, уулархаг газар, гуу жалгандаа 40-90 сантиметрийн зузаантай, хунгарласан цастай байгаа аж. Үүний улмаас малын хошуу, туруу, шилбэ халцарсан, аргал, янгир зэрэг ховор ан амьтад идэш, хоолгүйн улмаас уулнаас буун цасанд дарагдах явдал гараад байгаа гэнэ.
Их цасан шуурганы үед нэмж цас орвол зарим аймгуудад байдал улам хүндрэх төлөвтэй байгаа бөгөөд Ховд, Завхан, Хөвсгөл аймгийн уулархаг нутгаар өвөлжиж байсан малчид мал сүргээ тарга тэвээрэг алдаагүй байгаа дээр говийн бүс рүү нүүдэллэж байгаа юм байна. Энэ ажлыг аймаг, орон нутгийн удирдлагууд анхааралдаа аван, отрыг малчидтай хамтран зохион байгуулж байгаа аж.
Мөн үүссэн нөхцөл байдалтай холбогдуулан орон нутгийн удирдлагууд, малчдын зүгээс бага насны хүүхэд, малчдад дархлаа сайжруулах, биеийн эсэргүүцэл дэмжих амин дэм, илчлэг, тэжээллэг хоол хүнс олгох, улсын нөөцийн өвс, тэжээлийн үнийг хямдруулах, эрүүлд мэндийн тусламж үйлчилгээ үзүүлэх, автомашин шинээр олгох, уасанд суусан, боогдсон, эрэн хайх, аврах ажиллагааны дуудлага нэмэгдэж байгаа тул шатахууны асуудлыг шийдвэрлэх, цасанд хаагдсан зам, давааг нээх зориулалтаар ачигч, түрэгч, ковш, туулц сайтай автомашин олгож өгөх хүсэлтийг ирүүлсээр байгаа гэнэ. Харин өвөлжилт хүндэрсэн энэ үед малчдад тусламж үзүүлэх улсын нөөцөөс татан байршуулах өвс, тэжээлийн аюулгүйн нөөцийн бэлэн байдлыг бүрэн хангасан гэж ОБЕГ-аас нэмж мэдээллээ.
Сэтгэгдэл