“Микрософт” компанийг үүсгэн байгуулагч Билл Гейтс болон бусад томоохон компаниудын захирлууд уур амьсгалын асуудлаарх Парисын гэрээ байгуулагдсанаас хойш нэг жилийн дараа цаг уурын өөрчлөлтийг асуудлыг шийдвэрлэхэд тус дөхөм болох үүднээс цэвэр эрчим хүчний технологийг боловсронгуй болгоход нэг тэрбум долларын хөрөнгө оруулалт хийлээ.
Б.Гейтс даваа гарагт “Facebook”-ийн тэргүүн Марк Цукерберг, “Alibaba”-ийн Ерөнхийлөгч Жак Ма болон “Amazon”-ын тэргүүн Жефф Безос нартай хамтран Эрчим хүчний хамтарсан санг байгуулсан байна.
Тус сан нь Парисын гэрээний зорилтуудад хүрэхэд тус дөхөм үзүүлэхийн тулд эрчим хүчний судалгааны санхүүжилтийг нэмэгдүүлж, хүлэмжийн хийн ялгаралтыг бууруулахыг зорьж байна гэж "Эрчим Хүчний үсрэнгүй өөрчлөлтийн эвсэл" гэдэг нэртэй хөрөнгө оруулалтын группээс гаргасан мэдэгдэлд дурджээ.
2015 оны 12 дугаар сард байгуулагдсан уг эвслийн хамгийн анхны томоохон хөрөнгө оруулалт нь цэвэр эрчим хүчний технологийн судалгаа, үйлдвэрлэлийг дэмжихэд чиглэсэн байна.
“Бидэнд хүлэмжийн хий ялгаруулдаггүй хямд, найдвартай эрчим хүч хэрэгтэй. Ийм эрчим хүчийг бий болгохын тулд бидэнд хөрөнгө оруулалтын өөр загварчлал хэрэгтэй. Бид шинэ содон санаанд хөрөнгө оруулалт хийж тэдгээрийг лабораториос зах зээлд гаргах хэрэгтэй” гэж Б.Гэйтс “Quartz” гэдэг онлайн сэтгүүлд өгсөн ярилцлагадаа дурджээ.
Өнгөрсөн жил Б.Гэйтс цэвэр эрчим хүчний технологи дахь хөрөнгө оруулалтыг өргөжүүлэхэд чиглэсэн төр-хувийн хэвшлийн түншлэлийг бий болгоход өөрийн хувь нэмрийг оруулсан билээ.
Д.Трамп АНУ-ын Ерөнхийлөгчөөр сонгогдсоноор цэвэр эрчим хүчний судалгаанд засгийн газраас цаашид мөнгө зарцуулсаар байх уу үгүй юу гэдэг асуудал гарч ирж байгаа юм.
Учир нь, цаг уурын өөрчлөлт гэдэг бол хятадуудын бодож олсон хууран мэхлэлт гэж Д.Трамп хэлсэн билээ.
Даваа гарагт Б.Гэйтс хэлэхдээ "эвслийн гишүүд цэвэр эрчим хүчний талаар Трампад мэдээлэл хүргэсээр байх болно" гэжээ.
Х.Сарнай
Эх сурвалж: Монцамэ
3 сэтгэгдэлСэтгэгдэл