Баянзүрх дүүргийн засаг дарга Д.Пүрэвдаваа 2015 оны 11-р сард дүүргийнхээ Хүүхэд, Гэр бүлийн хөгжлийн төвийн дарга Н.Эрдэнийг жирэмсэн байхад нь зодож биенд нь ноцтой гэмтэл учруулсан тухай мэдээлэл тухайн үед гарч байсан. Гэвч Баянзүрх дүүргийн Засаг дарга Д.Пүрэвдаваа “Би нэг ч эмэгтэй хүнд гар хүрээгүй. Н.Эрдэнэ гэх эмэгтэйг би нэг ч удаа зодож байгаагүй” гэж мэдэгдсэн байжээ. Гэтэл уг асуудлыг хууль хяналтын байгууллага өнгөрөгч хугацаанд шалгаж, гурван шатны шүүхээр шийдвэрлэгдсэн байх юм.
БЗД-ийн Хүүхэд гэр бүл хөгжлийн төвийн дарга асан Н.Эрдэнэ Засаг дарга Д.Пүрэвдаваад зодуулсан хэргийг өчигдөр Улсын дээд шүүх хянан хэлэлцэж, хэргийг анхан шатны шүүхэд шилжүүлэх шийдвэр гарчээ.
Өмнө нь анхан болон давж заалдах шатны шүүхээс БЗД-ийн Засаг дарга Д.Пүрэвдавааг гэм буруутай хэмээн шийдвэр гарч байсан бөгөөд өөрөөр хэлбэл анхан болон давах шатны шүүхийн шийдвэр Н.Эрдэнийг хохирогч гэдгийг тогтоосон. Харин хяналтын шатны шүүх анхан болон давах шатны шүүхийн шийдвэрийг хянаж үзээд анхан шатны шүүх рүү шилжүүлэх шийдвэр гаргажээ.
Энэ талаар хохирогч Н. Эрдэнээс тодрууллаа.
-“Таныг БЗД-ийн Засаг дарга Д.Пүрэвдаваа зодсон гэх хэрэг шүүхээс хэрхэн шийдвэрлэгдэж байна вэ? Ер нь анх юунаас болж танд гарч хүрэх болов. Энэ талаар тодруулахгүй юу?
– Баянзүрх дүүргийн Хүүхэд Гэр бүлийн хөгжлийн төвийн даргаар ажиллаж байхдаа Д.Пүрэвдаваад 2015 оны 11-р сард жирэмсэн болоод дөнгөж хүүхдээ бүрэлдэж байхад зодуулж байсан. Мөн 2016 оны 1-р сард дахин зодуулсан. Анх 2015 оны 11-р сард намайг “Мал нохой шиг олон төрлөө. Одоо чи төрөх гэж байгаа юм чинь манай найзад ажлаа өг. Эсвэл гэртээ бай” гэж зодож дарамталсан.
Харин 2016 оны 1-р сард миний эрхэлж байсан ажлыг өөрийн найздаа өгч намайг албан тушаалаас минь буулгаж, өөрийн эрх мэдлээ ашиглан иргэдээс бэлэн мөнгө татах хууль бус үйлдлийг нь мэдэж эсэргүүцсэн учир дахин зодож танхайрсан.
-Хоёр ч шатны шүүх Д.Пүрэвдавааг гэм буруутай гэж үзсэн. Гэтэл Улсын Дээд шүүх хэргийг буцаасан байна. Яагаад буцаах болов. Энэ талаар та ямар бодолтой байна вэ?
-Би хүүхдээ төрүүлээд 4 сар болж байна. Хоёр настай, 4 сартай хоёр нялх хүүхэдтэйгээ Төв аймагт амьдарч байгаа. Өчигдөр нялх хүүхдүүдээ орхиод хөхөө чинэрүүлэн, сүүгээ гоожуулан байж шүүх хуралд оролцлоо. Харамсалтай нь Улсын Дээд шүүх Д.Пүрэвдаваагийн талд шийдвэрийг гарчихлаа.
Өмнө БЗД-ийн Иргэний хэргийн анхан, Нийслэлийн Давж заалдах шатны шүүх намайг хохирогч гэдгийг тогтоосон. Гэвч Дээд шүүх хоёр ч шатны шүүхийн шийдвэрийг үгүйсгэлээ. Эндээс Дээд шүүхийн шүүгчид нөлөөнд автсан уу гэж бодогдоод байгаа юм. Өөрөөр хэлбэл Д.Пүрэвдаваагийн ард түүнийг хамгаалдаг том хүн байна гэж би бодож байна.
Өмнө нь Д.Пүрэвдаваагийн асуудлаар Авлигатай тэмцэх газарт хандсан боловч хэргийг хэрэгсээгүй. Одоо Улсын Дээд шүүх хэргийг буцааж байна.
Үүнд том нөлөө байна л гэж хардахаас аргагүй байгаа юм. Тухайлбал, саяхан болж өнгөрсөн сум, дүүргийн ИТХ-ийн сонгуульд Ерөнхийлөгчийн хүү Ц.Эрдэнэ өрсөлдөж сонгогдсон. Магадгүй түүнийг БЗД-т нэр дэвшиж, өрсөлдөхөд Д.Пүрэвдаваа нөлөөлж, харин Д.Пүрэвдаваагийн арыг Ерөнхийлөгч хамгаалж байж болзошгүй л гэж хардаад байгаа юм.
-Улсын Дээд шүүх хэргийг анхан шатны шүүх рүү буцаачихлаа. Хэрвээ анхан шатны шүүхийн шийдвэр таны эсрэг гарвал яах вэ. Ер нь цаашид ямар арга хэмжээ авах вэ?
-Би Д.Пүрэвдаваагийн асуудлаар цаашид ч тэмцсээр байх болно. Хоёр нялх хүүхэдтэй чадал муу эмэгтэй хүн энэ асуудлаас болж сэтгэл санаа, нэр хүндээрээ хохирч, олон ч удаа гутаан доромжлууллаа. Тиймээс хохиролоо барагдуулахын тулд тэмцсээр байх болно.
Түүнийг дүүргийн АН-ын дарга болон Засаг дарга гэх албан тушаалын хэргэм нь миний хэргийг шийдвэрлэхэд ихээхэн нөлөөлж, хаацайлаад байх шиг байна. Уг асуудлыг хууль, шүүхийн байгууллага нь шийдвэрлэж өгөхгүй бол БЗД-ийн Тамгын газрын гадаа хоёр хүүхдээ дагуулж очоод сууна гэж бодож байна. Би хуулийн дагуу асуудлаа тавиад явж байна. Д.Пүрэвдаваа шиг хууль зөрчөөгүй” гэсэн юм.
Дүүргийн Засаг дарга асан Д.Пүрэвдаваа гэдэг хүн нялх хүүхэдтэй, хөхүүл хүнийг жил гаруй хугацаанд шүүх цагдаагаар явуулж чийрэгдүүлсэн байх юм. Яасан ч завтай хүн байдаг юм бэ дээ. Уг нь түүнд энэ эмэгтэйтэй шүүхдэлцэж явахаас илүү хийх ажил олон баймаар юм.
Г.Нараа
Сэтгэгдэл